O partido xogouse o sábado pola tarde no pavillón Lorenzo de La Torre, co ascenso xa no peto dos obradoiristas, pero co orgullo en xogo de acabar invicto no grupo Norte da fase de ascenso.

Empezou sendo un xogo moi disputado e parello no marcador durante o primeiro cuarto pero no segundo os locais caían en numerosas perdas de balón por algo de falta de concentración, que permitiu aos do Básquet Coruña correr o campo e anotar con facilidade ata en situacións de tres contra cero. Así se chegaba ao descanso cunha diferenza de 11 puntos a favor dos coruñeses (25-36).

Tras o paso polos vestiarios, os do Obra sacaron a relucir o carácter, o espírito de loita, a intensidade e a capacidade de esforzo que lles levou a conseguir os obxectivos, e cunha defensa en zona presionante e asfixiante, conseguía cortocircuitar o ataque visitante. Tras dominar o rebote e roubos de balón, correron ben o campo para anotar tras transicións rápidas e un bo xogo colectivo en ataques estáticos. Outra vez foron capaces de remontar un marcador adverso e impoñer o seu ritmo de xogo nun partido que na primeira parte se presentaba desfavorable.

Os parciais de cuartos foron 17-19, 9-19, 23-9 e 13-8.