GK Creativity - шаблон joomla Скрипты

O III Campus Obradoiro CAB - Barbanza, que se celebrará en Boiro entre o 27 de xuño e o 1 de xullo, contará no seu equipo técnico con nomes recoñecidos do baloncesto santiagués e barbanzano. Dirixida polo adestrador da canteira do club, Pablo Vázquez, a actividade contará con Dan Petts, actual adestrador do equipo júnior e axudante do corpo técnico do primeiro equipo, como director técnico.

Con só vinte e cinco anos e tras dous no club, Dan Petts resume na súa experiencia propia os valores obradoiristas que inclúen o esforzo e o compromiso constante, conceptos que quere facer chegar agora aos participantes do campus.

Como director técnico deste, ten moi claros os obxectivos: "Primeiro, que os rapaces gocen, que o pasen ben amando o baloncesto". "É certo que é moi pouco tempo, e os nenos veñen a xogar, a gozar. Pero ao mesmo tempo, poden aprender. Despois desta semana todos sairán con máis nivel do que traían, fose este xa alto ou case nulo. Estas actividades son unha oportunidade para todos", afirma. Engade tamén que "haberá outras actividades, ao realizarse nun pobo de costa e con tantas posibilidades como Boiro. Seguro que sacamos algún momento para ir á praia, por exemplo", aventura.

El empezou a xogar, como moitos rapaces, no colexio da súa vila natal, Essex, aos 10 anos. Alí, grazas ao seu adestrador, foise namorando do baloncesto, ata o día no que este partiu e o equipo quedaba sen dirección. "Non" tiñamos "adestrador nin parecía que fosemos a telo, así que me ofrecín a exercer diso ao mesmo tempo que xogaba. Esa foi a miña primeira experiencia de técnico", recorda. Continuou na súa universidade e como semiprofesional, e ao mesmo tempo de pasalo ben "gañaba algo para continuar estudando", relata a xeito de anécdota.

A partir de aí, a carreira de Petts foi sempre en ascenso. Recibiu a chamada da selección inglesa U17 para exercer de analista de vídeo nun torneo, para logo ser axudante júnior na U18 dirixida polo ex xogador dos Lakers, Steve Bucknall. Petts segue co seu combinado nacional U18 catro anos despois, exercendo agora de primeiro axudante do técnico Karl Brown, "con quen teño moita confianza e me resulta especialmente agradable traballar despois de cultivar amizade durante todos estes anos de traballo nos que estivemos sempre man a man", explica.

Recalou no Rio Natura Monbus Obradoiro tras finalizar os seus estudos de ciencia e análise deportiva: "Parte do máster era en Valencia. Alí foi a varios adestramentos da Valencia Basket, e Chechu Mulero, técnico por aquel entón, faloume deste club. Díxome que era un gran sitio para aprender e que podía probar a ver se tiña sitio".

E así foi. Tras a súa chegada ao obradoirismo na tempada 13/14 para continuar formándose a través dunha bolsa, o mozo quedou tamén este finalizado curso. Co corpo técnico do primeiro equipo realizou diversas tarefas: "Foi un traballo moi variado. Principalmente, axudei  a Víctor e Gonzalo co scouting propio e do rival. A maiores, confiaron en min para que realizase adestramentos individuais de desenvolvemento con algúns xogadores: mellora da axilidade, coordinación, etc", aínda que tamén estivo implicado noutros proxectos extradeportivos do club, como O Camiño Acaba en Obradoiro.“Gústame adestrar e gústame España, é o sitio con máis nivel onde estiven, pero aínda non estou seguro de que camiño elixirei no futuro dentro do baloncesto. Esperarei a ver de cal chegan oportunidades para pensalo”, reflexiona.

Como adestrador do equipo júnior das categorías base do club,Petts confesa sentirse "moi orgulloso co desenvolvemento do equipo esta tempada, os rapaces fixeron un xenial traballo. Tiñamos que mellorar táctica, técnica e psicoloxicamente en moi pouco tempo, tres ou catro horas cada semana. E ao mesmo tempo e máis importante a esta idade, mellorar en valores fóra do baloncesto, os que o Rio Natura Monbus Obradoiro quere transmitir: traballo en equipo, compatibilidade cos estudos, etc".

Pero a experiencia vital deste apaixonado do seu traballo tamén inclúe, por suposto, moitos campus. "Asistín a moitos, claro. Un dos meus mellores recordos neste deporte é precisamente xogando no campus que organiza Luol Deng. Son moi bos na formación do xogador, porque durante a tempada cos estudos, non hai tempo para estas actividades máis libres. Para empezar, como primeiro contacto con este deporte, son ideais”, di.

Todos os nenos que queiran vivir esta experiencia única no III Campus Obradoiro CAB - Barbanza poden anotarse aínda nas oficinas do club ou no correo Este enderezo de correo está a ser protexido dos robots de correo lixo. Precisa activar o JavaScript para velo.. Os prezos van dos 70 aos 295 euros dependendo réxime e tipo de desconto. Toda a información detallada en www.obradoirocab.com.